Inicio » Espectaculos Xanela do Maxín » Supercoroza. Na eira e na lareira

Supercoroza. Na eira e na lareira

SUPERCOROZA, protagonista de Na Eira e na Lareira, é salvagarda do noso: da nosa xente, da nosa lingua, música, contos e tradicións. O seu superpoder á a recuperación da tradición e procura a transmisión cultural a través da música, baile, contos… dun xeito ameno, divertido e participativo.

Os contos e as cancións en Galicia servían para transmitir o calendario agrícola e os mitos dunha xeración a outra e o galego foi o seu vehículo de transmisión. A importancia da lingua nesta transmisión resulta fundamental dado que hoxe sabemos que as distintas linguas permiten costruír mentes distintas, polo tanto, a idiosincrasia das persoas que viven en Galicia e a súa tradición oral non sería o mesmo se non fora en galego, por iso tamén a necesidade de falalo e protexelo.

Neste espectáculo cantarase e contarase como se facía de antigo, para para que estas historias e cancións poidan seguir transmitíndose de xeración en xeración, ofrecendo unha xanela única ao noso pasado colectivo.

Valoracións da actividade

“Necesaria, enriquecedora, divertida, interactiva, formidable”– CEIP Xuvencos (Boborás)

“Divertida e culturalmente interesante. Poñendo en valor as tradicións dun xeito lúdico. Moi xeitosa e interesante. Preguntei ao profesorado que estivo e todos e todas dixeron que tivo a duración ideal, interesante, divertida, didáctica e que mantivo a atención do alumnado ( e do profesorado!) de principio a fin”

“Estupenda. Gustoume moito o feito de que o actor (Lois) tocase o punteiro, gaita, pandereta, lata…en directo. É moi importante en relación ao alumnado (e profesorado) e non ocorre en moitas actuacións escénicas. Tamén a interpretación de Lois e o guión. Parabéns e grazas!!!” – CEIP Xuvencos (Boborás)

“Super ben, encantoume. Vaille moi ben ó alumnado a todos os niveis, aprenden e desfrutan”

“Motivante, lúdica e tradicional” – CEIP Monseivane (Vilalba)

“Moi boa, vestiario, instrumentos, vocabulario…xenial!”

“Pareceume unha posta en escea moi elaborada e detallada; vestimenta, aderezos, escenario e aperos empregados. Implicar á rapazada na actuación sempre é un punto a salientar xa que lles gusta ser parte do que escoitan. O chico que actuo implicouse moito e tanto aos nenos coma ás mestras que estivemos na representación quedamos encantados. Sen duda repetiremos experiencia” – CEIP Lois Tobío (Viveiro)

“Interactiva e implicativa cos rapaces 100%”

“Divertida, didáctica, con boa posta en escena e moi bo trato actor/alumnado. Noraboa, gustounos moitísimo. A ben fiada que está a historia e os temas tratados nela.” – CEIP Lois Tobío (Viveiro)